لو عندك استفسار تواصل معنا 01066968707, 01008370149

ازاي تغير كارت الشاشة الخاص باللابتوب؟

كارت الشاشة

استكمالا لسلسلة المقالات المتعلقة بـ كارت الشاشة لأجهزة اللابتوب هنكمل معاكم النهارده في موضوع أكيد مريت بيه قبل كده وانت بتشتري لاب توب او محتاج تحدث بعض امكانيات اللاب …. وهو

هل ممكن اغير كارت الشاشة الخاص باللاب توب ولا لأ ؟!

قهوتك… وركز معانا….

عشان تغير كارت الشاشة الخاص باللابتوب عندك طريق من اتنين :

الطريق الاول

انك تشتري كارت MXM… ايه يا عم الـ MXM ده ؟!!

ده يا سيدي منفذ او Slot موجود داخل اللابتوب زي منفذ الـ SATA 3 اللي بتركب فيه الهارد او منفذ الرمات.

وده منفذ قديم أو تواجده قليل جدا في أجهزة اللابتوب لانه متوفر في الغالب بأجهزة الـ Workstation او الموديلات القديمة من أجهزة اللابتوب اللي هي صعب تلاقيها أو أسعارها بتكون ضاربة في السما وصعب توافره بالاجهزة الحديثة المتوفرة الفترة ديه
“يعني فكرة شراء النوع ده من الاجهزة صعبة جدا.”

ومن بعض المشاكل اللي هتواجهنا مع كروت MXM إنه مش كل كروت الشاشة متوفر منها MXM يعني مثلا لو فرضنا ان شركة زي Nvidia عندها 15 كارت شاشة مختلف، هتلاقي ان عدد كروت الـ MXM منهم لا تتعدي الـ 5 كروت مثلا، بالاضافة ان كارت الـMXM ليس له ابعاد او مقاسات محددة ولا يتم توفيره من قبل مصنعي كروت الشاشة زي AMD او Nvidia ولكن يتم توفيره من قبل الشركة المصنعة لجهاز اللابتوب زي hp او dell وغيره ، وبكده الكارت لو موجه مثلا للاب hp مش هتقدر تستخدمه مع لاب dell او العكس.

بالاضافة ان اللاب الواحد ممكن يدعم كارت MXM معين فقط بسبب الطاقة اللي بيحتاجها الكارت والتبريد واذا كان الـBIOS الخاص بالجهاز يدعم الكارت ولا لا. يعني مثلا لو الجهاز بتاعك فيه منفذ MXM واقصي طاقة يوفرها المنفذ مثلا 35 وات… وعندك 2 كارت MXM زي 1060 و 1070، كارت 1060 محتاج 30 وات وكارت 1070 محتاج 40 وات بكده مش هتقدر تركب كارت 1070، لان اقصي طاقة بيوفرها المنفذ 35 وات فقط. وده علي سبيل التوضيح ليس الا.

ومن الصعب توافر كروت MXM لدي المحال التجارية، اكتر الاماكن المتوفرة لديها هذه الكروت هما Amazon و eBay.

من أشهر الاجهزة الموجود بها منفذ MXM :

– Lenovo ThinkPad P50 Workstation
– MSI WE62 7RI 1862US Workstation
– HP Z Book 17 G4 Premium
ده كان بعض المعلومات المتعلقة بكروت MXM وتوافقها مع الاجهزة وتوفرها. ده طبعا مش كل حاجة عنها ولكن ديه اهم المعلومات اللي لازم تكون علي علم بيها.

الطريق التاني

هو جهاز خارجي شبه الكيسه الخاصة بالكمبيوتر اسمه Enclosure او Docks او GPU Box بيكون فيه مزود طاقة خاص تقدر تركب فيه كارت شاشة زي ما أنت عايز، هو مُكلف برضه، بس حل أفضل من MXM، لأنك تقدر تركب كارت شاشة أعلى من أقوى كارت موجود للابتوبات، بس لازم يكون اللابتوب فيه مدخل Thunderbolt، وده مدخل تقدر ترسل وتستقبل منه إشارة فيديو وصوت وداتا في نفس الوقت.

ولكن كالعاده في الهاردوير الحلو ميكملش لازم تقابل شوية مشاكل من ضمنها ان الكيسه ديه سعرها مكلف حبيتين يعني معاك من 200 دولار سيب الميزانية مفتوحة، ده غير تكلفة كارت الشاشة نفسه اللي هيركب في الكيسه، وطبعا مش عاوزين ننسي تكلفة اللاب الاساسية. من الاخر تكلفة ممكن تشتري بيها لاب توب تاني.

ده غير ان كل شركة بتوفر النوع ده من الكيسات في الغالب مش بيشتغل الا مع اجهزة اللاب توب الخاصة بيها زي مثلا Alienware’s Graphics Amplifier المقدم من شركة dell لا يحتوي علي اي منافذ USB او Thunderbolt ولكنه بيستخدم منفذ مُصنع خصيصا من شركة dell بمعني اخر يعني حكر علي اجهزة dell فقط. يعني مش هتقدر تستخدم Alienware’s Graphics Amplifier مع اجهزة زي Asus او Razer او omen وغيره.

ولازم تكون عارف كمان ان كارت الشاشة بيركب جوه الكيسه عن طريق منفذ PCIe والكيسه ديه بيتم توصيها باللاب توب عن طريق منفذ Thunderbolt ، وهنا هتقابلنا مشكلة اننا مش هنستفاد بكامل اداء الكارت. لانه يمكن لمنفذ PCIe نقل الكثير من البيانات بسرعة كبيرة ، حتى ان أحدث منافذ Thunderbolt و USB-C لا يمكن أن يتطابق مع معدل البيانات الخاص بمنفذ PCIe .
وطبعا مش عاوزين ننسي المشاكل اللي ممكن تقابلنا زي عنق الزجاجة او bottleneck .. بسبب عدم توافق الكارت الخارجي مع البروسيسور الخاص باللابتوب.

“الخلاصة”
فكرة تغير كارت الشاشة في اجهزة اللابتوب فكرة غير مجدية بالمرة ولا تلبي الاحتياجات ده غير انها مش هتقدم فرق جوهري في الاداء.

وعشان كده لازم تحدد احتياجاتك ومتطلباتك من الجهاز قبل عملية الشراء. ولازم يكون عندك علم بالمعلومات ديه عشان ميضحكش عليك من قبل التجار او بعض الصفحات الل بتستغل الجزئيات ديه كتسويق للمنتج.

شاهد أيضا:

اترك تعليقاً