الهارد بقي DNA !

بقالك فتره الهارد بتاعك مليان و مش عارف تودي الداتا بتاعتك فين!
كل فتره بتشتري هارد جديد و المساحه مش مكفية؟
سمعت عن الكلاود و مش عايز تدفع كل شهر مبالغ عشان تشيل بياناتك؟

تعالى اقولك على آخر ما توصل له العلم في حل مشاكل التخزين….
عمرك سألت نفسك ليه دايماً الإبن بيبقى شبه الأب والأم وازاي الشبه ده بيتنقل من جيل لجيل؟
سر تناقل الصفات ده بيعود لفضل الDNA ولو متعرفش يا عزيزي الGeek فالDNA ده بيحمل الشفره الوراثية اللي بتحمل الصفات زي لون الشعر و لون البشرة و لون العين الخ..

و الDNA ده بيكون عباره عن ٤ حاجات ملهمش خامس.
اسمهم A و G و C و T و من خلال تكرارهم و تغيير ترتيبهم داخل خلايا جسمك بطريقة معينه بيعمل الصفات اللي بتظهر عليك
(هتقولي انت بتاع تكنولوجيا مش بتاع احياء ما تفهمني ايه دا؟)

ما انا جايلك في الكلام اهو..
شايف نفس اللي حصل مع الDNA كده عشان يحدد صفاتك هنعمل زيه بالظبط عشان نحفظ بياناتك.

من خلال اننا نتحكم بترتيب ال ٤ حاجات اللي كلمتك عنهم فوق هنقدر نخزن بيانات بتاعت حضرتك

-طب وأنا كده استفادت ايه و ايه الفرق بينه وبين الهارد بتاعي؟
انت عارف إن حجم البيانات اللي ممكن تشيلها في جرام واحد من الDNA ده يساوي كام؟
يساوي تقريبا 220,160 تيرا بايت!!
يعني تقريبا البيانات بتاعتك طول حياتك كلها في جرام واحد بس!

لا واقولك كمان على باقي الميزات
انت عارف ان الهارد ال١ تيرا تقريبا وزنه ٤٠٠ جرام
لا وكمان الDNA صعب جدا انه يبوظ على عكس الهاردات بتاعتنا او الSSD لانه عمره الافتراضي ٥٠٠ سنه يعني هتشيل حرفيا تاريخ عائلات كامله و تنتقل من جيل لجيل
-طب لو عوزت اعمل منها نسخه اعملها ازاي ده الموضوع شكله طلع كبير و بيحتاج اجهزه و حوارات

عارف البكتيريا؟
اهو في نوع بكتريا كل اللي عليك انك تديله الDNA ده و هو لوحده هيعملك منها نسخه بدون ما يحصل خطا او مشاكل(طبعا في معامل ها..) يعني انسخ براحتك ولا يهمك

و العلماء و الخبراء شغالين دلوقتي انهم يخلوا قواعد البيانات حوالين العالم كلها تشتغل بالDNA بسبب الكفاءة بتاعته و قدرته الرهيبه في تخزين وحفظ البيانات، فمتستغربش كمان كام سنه لما تروح تجيب الهارد بتاعك من معمل كيمياء

ايه رأيك في الاختراع ده وهل شايف انه حل كويس ؟