خبر غريب بخصوص شركة EVGA

شركه #EVGA تعلن ايقاف تعاونها مع شركه #NVIDIA
واحد من الأخبار المحزنه الفترة دي هي خروج شركه EVGA (واحده من أفضل شركات صناعة كروت الشاشه) من شراكه نڤيديا في صناعة كروت الشاشه فتعالو نتكلم شويه عن الموضوع ده.

شركه EVGA كانت واحده من أفضل وأحسن مصنعي الكروت لنڤيديا بل وكانت الإختيار الأول لكاسرى السرعه المحترفين بفضل نسخه Kingpin المشهوره

وبالتالي خبر انهم يلغوا شراكتهم مع نڤيديا يعتبر خبر غريب، ولكن EVGA وضحت الاسباب.

فبتقول الشركه ان شراكتها مع نڤيديا كان مخطط له من شهر ابريل اللي فات وإنها مأعلنتش غير في الفترة الأخيرة دي والسبب ان نڤيديا كانت بترفض تقول أسعار الكروت وتفاصيل قبل الاطلاق لشركائها! و ده اللي بيجبر الشركاء انهم يتأخروا في إطلاق الكروت الخاصه بيهم و ده بيدي أفضليه للنسخه القياسيه للكروت اللي بتنتجها نڤيديا فده بيخلي نسبه كبيرة من الربح تروح لنڤيديا خاصه وان الكروت اللي بتطلقها شركات الشركاء زي EVGA و اسوس و Msi بتكون أغلى كمان بالذات في حاجه الفئات العليا فده بيخلي أرباح الشركاء تقل بل وتؤدي للخساره في حاله EVGA
واللي زود الأوضاع سوء هي فتره الكورونا، اللي كانت شركه نڤيديا بتبيع فيها أكتر بسبب ان كروتها مكنش فيها LHR فكان المعدنين بيتجهوا ليها اكتر

الشركه صرحت ان العاملين في مجال كروت الشاشه هيتم نقلهم لأقسام تانيه من الشركه وانها الفتره الجايه هتهتم بباقي المنتجات الخاصه بيها زي الباورصبلاي و اكسسوارات الجيمينج والماذر بورد وغيرها.

وان جميع كروتها اللي اتباعت و اللي لسه هتتباع هيكون ضمانها موجود عادي و لو الكارت بتاعك ملهوش قطع غيار عندهم فهم هيحاولوا يوصلوا معاك لحل آخر زي انهم يرجعولك جزء من فلوسك او تاخد كارت اخر لو متاح!

قولنا ايه رايك في الكومنتات و هل شايف ان ده قرار صح من الشركه ولا لا؟