زيادة رامات كارت الشاشة (حقيقة أم كذبة؟)

اتكلمنا قبل كده ف بوست سابق عن كارت الشاشة وأهميته في مجال الالعاب والتصميم.

ولكن في نقطة معينة حبينا نركز عليها بشكل منفصل في المقال ده… وهي هل يمكن زيادة رامات كارت الشاشة ولا لا ؟

هنحاول في المقال دا نجاوب علي السؤال ده بطريقة سهلة.

أكيد في مرة من المرات وانت بتبحث عن لاب توب معين علي الانترنت او في محل من المحلات سمعت ان كارت الشاشة الخاص بالاب توب up to 20 giga مثلا او كارت الشاشة بيرفع لـ 10 , 20 جيجا وارقام غريبة …. هل الكلام ده صح ولا لأ ؟!

في الاول لازم نعرف ان كارت الشاشة نوعين :

1- هو الكارت المدمج او الداخلي او built-in.
2- هو الكارت الخارجي او المنفصل او discrete او dedicated

النوع الأول

وهو المدمج ده بيكون “من اسمه” مدمج مع البروسيسور علي نفس الشريحة، يعني البروسيسور وكارت الشاشة اتنين في واحد. وبيكون موجود في معظم معالجات انتل زي Core i7,i5,i3 ومعالجات AMD زي Ryzen™ 5 2400G و Ryzen™ 3 3200G وغيره.

وظيفة كارت الشاشة المدمج او الداخلي هي القيام بعمليات المعالجة الرسومية الضعيفة او المتوسطة زي الالعاب الخفيفة او مشاهدة المحتوي واعمال الكتابة وتعديل الصور والمهام البسيطة.

من أهم مميزات الكارت الداخلي انه موفر جدا للطاقة وبالتالي يحافظ علي عمر بطارية اللاب توب وتقدر تستخدم الجهاز عدد ساعات اكتر ، بالاضافة انه سعره رخيص فيعتبر حل اقتصادي لبعض الاجهزة ، وكمان الحرارة الناتجة عنه معقولة جدا وبما انه مدمج مع البروسيسور مش محتاجين غير دائرة تبريد واحدة فقط يعني استهلاك اقل وصوت مراوح اقل.

اهم نقطة عاوزين نتكلم عنها بخصوص الكارت الداخلي انه بيستهلك من رامات الجهاز الأساسية يعني لو عندك رامات 4 جيجا ، كارت الشاشة ممكن يستهلك منهم 1 جيجا. يعني كده المتاح لباقي النظام 3 جيجا فقط. بطبيعة الحال ، مقدار الرامات المستهلكة بواسطة الكارت الداخلي يعتمد على التحميل علي الكارت والمهام المطلوب معالجتها.

النوع التاني

وهو الكارت المنفصل او الخارجي “من اسمه” هو معالج رسوميات موجود علي شريجة منفصلة تماما ليس له علاقة بالبورده او البروسيسور الخاص بالجهاز، من أشهر مصنعي الكروت الخارجية شركتي Nvidia و AMD.

الكارت الخارجي ليه الرامات الخاصة بيه وتسمي VRAM وهي رامات مستقلة خاصة بالكارت الخارجي فقط ولا يمكن التحكم فيها اطلاقا سواء بالزيادة او النقصان، لان رامات كارت الشاشة مبنية علي شريحة الكارت مع المعالج الرسومي بالاضافة ان الشرائح او التكنولوجيا اللي بيتم عن طريقها تصنيع ذواكر كروت الشاشة تحتلف عن تقنيات الرامات الخاصة بالجهاز وعشان كده لايمكن التحكم فيها… يعني لو انت معاك مثلا كارت 1050Ti بذاكرة 4 جيجا، الذاكرة ديه مخصصة للكارت فقط ولا يمكن باي حال من الاحوال انك تزودها لاي رقم.

وده يخلينا نذكر نقطة مهمة جدا ان في عدد كبير من التجار او الصفحات لما تذكر مواصفات الجهاز يقول ان الكارت مثلا 4 جيجا اب تو 10 او 15 جيجا والكلام ده غير صحيح اطلاقا، للاسباب اللي وضحناها فوق، وبسبب النقطة ديه ناس كتير بيضحك عليها بأن امكانيات الجهاز جبارة وهيشغل معاك اي حاجة والكلام ده ليه معنيين ان الشخص اللي بيبيع او بيعرض عليك الجهاز للاسف مش فاهم او انه فاهم بس بيضحك علي الناس وبيستغل جزئية الرامات كتسويق للمنتج وللاسف ده اسمه نصب …

طبعا الكارت الخارجي اداءه اقوي بكتير من الكارت الداخلي يعني لو انت لاعب محترف او مصمم محترف او منشئ محتوي لابد من استخدام الكارت الخارجي والاداء العالي ده اكيد طبعا بينعكس علي السعر والحرارة ، فالاسعار الخاصة بالكروت متفاوته وكلما زادت متطلباتك هتحتاج كارت اقوي يعني فلوس اكتر والحرارة طبعا بتكون مرتفة وبالتالي في بعض الاحيان بتحتاج تبريد خاص بالكارت فقط ، ده غير استهلاك الطاقة المرتفع.

ومن المعلومات اللي لازم تعرفها..

ان الكارت الخارجي باجهزة الديسكتوب لك كامل الحرية في تغييرها. علي عكس اجهزة اللابتوب لان الكارت بيكون مدمج علي البورده الخاصه باللابتوب مصنعيا لاعتبارات كتيره منها سُمك او حجم اللاب والطاقة المستهلكة والحرارة ودوائر التبريد، وده طبعا بينعكس علي الاداء.

يعني لو معاك لاب توب بكارت Nvidia 1060 هيكون اقل في الاداء من نفس الكارت الموجه للديسكتوب بحوالي 20% مثلا للاعتبارات اللي تم توضيحها. وممكن الجزئية الخاصة بتغير كروت الشاشة لاجهزة اللابتوب نناقشها بمقال منفصل.
معلومة اضافية كمان لو انت بتشتري كارت شاشة او بتبحث عن لاب توب بكارت محترم ، الرامات ليست مقياس اطلاقا لقوة الكارت علي سبيل المثال كارت RTX 2060 و كارت GTX 1660TI كلاهما برامات 6 جيجا ولكن فرق شاسع بين الاتنين من ناحية عدد الانوية والتقنيات والاداء. في المجمل تفوق كبير لكارت 2060.

في النهاية لو حابب تعرف تفاصيل اكتر عن كارت الشاشة الموجود باللابتوب اللي عاوز تشتريه ممكن تبحث عنه علي موقع الشركة المصنعة او تبحث عنه علي جوجل او تعرف تفاصيل اكتر عن الكارت علي موقع زي Userbenchmark. اقرأ تفاصيل الكارت الاول كويس عشان ميضحكش عليك وانت بتشتري.