لو عندك استفسار تواصل معنا 01066968707, 01008370149

إزاي تختار كارت الشاشة قبل ما تشتري؟

كارت الشاشة

استكمالاً لسلسة #اسأل_جيكس واللي بدأناها بـ تعريف البروسيسور.. هنكمل معاكم في واحد من أهم قطع الجهاز, ان لم تكن الأهم على الاطلاق في الوقت الحالي.. الا وهو كارت الشاشة.

مبدئيا كده كارت الشاشة ده يعتبر جهاز كمبيوتر تاني جوه الجهاز بتاعك. لأنه بيتكون من بروسيسور خاص بيه لوحده ورامات مستقلة خاصة بيه.

إزاي تفرق ما بين كارت شاشة والتاني؟

وعشان تعرف تفرق ما بين كارت والتاني لازم تعرف عن كل كارت بتشوفه الحاجات دي على سبيل المثال:

1- الـ VRAM Video random access memory حجمها قد ايه ممكن تكون 4 او 6 او 8 جيجا ووصلت حاليا لـ 11 جيجا رام.. الرام دي ممكن تعتبر انها بتخزن المعلومات اللي بينتجها الكارت لحد ما تطلعك على الشاشة.

2- نوع الرام اذا كانت مثلا GDDR4 اوGDDR5 او GDDR6 أحدث حاجة حاليا.

وفي طبعا مصطلحات تانية كتير زي Core Speed , Memory Speed , Architecture ولو شرحنا كل واحدة منهم لوحدها و أزاي ممكن تأثر على كارت الشاشة هتكون طويله جدا لدرجة انها ممكن تبقى سلسله لوحدها.

فخلينا نتكلم عن أهم الحاجات اللي هتفيد المستخدم فعلا في اختيار كارت الشاشة.

خلينى أقولك في البداية إن كروت الشاشة اللي بتسمع عنها لازم تكون حاجه من التلاته دول:

– Intel
– Nvidia
– AMD

في الأول هنتكلم على Intel عشان نريح بالنا منها.. بصراحة كده أنا لا اعتبرها كارت شاشه لأن استخدامه هيكون في الحاجات الخفيفة.. يعني مش جيمز وبرامج تقيله وكده.. مؤخرا في الأجيال الجديدة اتحسنت شويه وتقدر تشغل بعض الألعاب بفريم ريت مقبول ولكن مازال فيه فجوه كبيره بينها وبين كروت الشاشة اللي زي Nvidia و AMD

يعني لو انت استخدامك خفيف زي تصفح نت على برامج بسيطة ومشاهدة محتوي زي الافلام وشغل بسيط على الفوتوشوب.. كروت Intel هتكون كويسة جدا معاك في توفير الطاقة لو بتستخدم لاب توب.

ملاحظة مهمة:

كروت Intel تسمى بالكروت المدمجة (built in) لان الكارت بيكون مدمج في البروسيسور نفسه… يعني الكارت والبروسيسور واحد في نفس الشريحة.

وبالنسبة لكروت Nvidia و AMD فهي الكروت الـ dedicated يعني الكروت المنفصلة وهي كروت موجهة للاستخدام التقيل من العاب تقيله وبرامج تصميم وريندر ومونتاج وتعدين وحاجات تانية كتييييير.

ومن أهم سلاسل كروت Nvidia سلسة كروت ….GTX وأحدثهم وأقواهم RTX.
ومن اهم سلاسل كروت AMD سلسة كروت RX وكروت Vega Pro وغيرهم.

وقبل ما نتكلم في أي معلومات تاني حابب أتكلم عن أكبر إشاعة في تاريخ كروت الشاشة
الا وهي ان ذاكرة كارت الشاشة قابلة للزيادة … يعني لو سألت شخص اللاب ده كارت الشاشة بتاعه كام يقولك يا باشا ربع جيجا بس اب تو 16 ميلون جيجا.
الكلام ده مبيحصلش غير في كروت Intel اللي قلنا عليها انها كروت مدمجة في البروسيسور.. يعني لو زودت رامات الجهاز هتزيد رامات كارت الشاشة.

انما كروت Nvidia و AMD زي ما وضحنا هي كروت dedicated أي كروت منفصلة
ملهاش أي اتصال برامات الجهاز الأساسية سواء بالزيادة او بالنقصان.. لأننا وضحنا انها عبارة عن جهاز كمبيوتر مستقل ليه البروسيسور والرامات الخاصة بيه.

ومحتاج كمان أقولك على حاجة مهمة جدا جدا … إن كارت الشاشة أداؤه مش بيعتمد على حجم الرامات الخاصة بيه.. يعنى مثلا مش شرط خالص ان كارت الشاشة ال 4 جيجا يتفوق على كارت 2 جيجا.
لان فيه عوامل كتير جدا جدا هي اللي بتحدد ده بجانب الحجم، زي اللي اتكلمنا عنهم فوق.. الذاكرة الكبيرة لكارت الشاشة دي فايدتها بس لما تكون عاوز تشغله على شاشه خارجيه بدقه عالية جدا.. ف وقتها كارت الشاشة هيكون فعلا محتاج الذاكرة دي..
ف خدها قاعده كدا.. حجم كارت الشاشة مش مقياس لأداءه إطلاقا..

مثال بسيط علي الكلام ده:

شركة Nvidia عندها كارتين GTX 1060 6 GB وكارت RTX 2060 6 GB
الكارتين 6 جيجا .. ولكن طبعا مش نفس الفئة .. فئة RTX تتفوق وبقوة احدث أنواع الذاكرة ومعمارية احدث يعني معالجة اقوي واستهلاك طاقة اقل

اخر إضافة…

من اهم المواقع اللي هتفيدك في المقارنة ما بين كروت الشاشة واختيار الأفضل
موقع Userbenchmark وموقع NotebookCheck

كل اللي هتعمله أنك هتروح على جوجل وتكتب اسم الكارت وبعدها اسمه الموقع.. يعنى في الحالة دي هنكتب فى جوجل
Nvidia GTX 1060 NotebookCheck

أول نتيجة هتطلعلك هي الصفحة بتاعة كارت الشاشة ده على الموقع.. والصفحة دي هتلاقي فيها:

– سنة اصدار الكارت
– دقة تصنيعه
– السلسلة اللي بينتمى ليها الكارت
– استهلاك الكارت للطاقة
– والحاجات اللي كنت قولتلك عليها قبل كدا عن الكارت وهى ال Architecture و Core Speed وكل المعلومات التقنية الخاصة بالكارت
– واخر واهم حاجه هيقدمهالك الموقع ده هي ال Game Benchmarks الخاصة بالكارت. ودي هيعرضلك فيها اداء كارت الشاشة فى تشغيل الألعاب المشهورة على مستويات جرافيكس مختلفة.

شاهد أيضا:

اترك تعليقاً