لو عندك استفسار تواصل معنا 01066968707, 01008370149

المازربورد(البورده) أنواعها وموديلاتها.. وإزاي تختار الأنسب ليك؟

المازربورد

” هات قهوتك معاك وانت جاي تقري المقال دا “

جبتها ؟! يلا نبدأ  (متنساش تشير البوست لو عجبك)

جمعت فلوسك وأخيرا قررت تشتري PC … حطيت كل القطع ببالك، ووصلت عند المازربورد وهنا بدأت الحيرة … ايه كل الحروف دية والموديلات والأرقام والشركات.. اشتري أي بورده وايه الفرق بينهم وهل المازربورد هتأثر على الأداء؟؟

كل الأسئلة دية عن المازربورد هنحاول نجاوب عنها في البوست ده.

هنقسم الموضوع لأربع نقط أساسية تساعدك في عملية اختيار وشراء المازربورد المناسبة: –

– Socket (المقبس)
– Chipset and overclocking (الشريحة وكسر السرعة)
– Form Factor (الحجم)
– Extra Features (مميزات اضافية)

* Socket

هو أكبر واهم حاجة مميزة للبورده وهو القطعة أو المكان اللي بيركب عليه المعالج، والسوكت بيكون ليه احجام واشكال مختلفة علي حسب البروسيسور اللي هيركب عليه، وبالتالي مش ممكن نركب معالج من Intel على بورده AMD والعكس صحيح.

وكمان الشركة الواحدة زي intel مثلا بيكون ليها اكتر من سوكت وبكده مش هينفع نركب معالج على بورده بسوكت مختلف حتى ولو من نفس الشركة.
يعني مش ممكن تركب معالج جيل تالت من intel على بورده جيل تاسع وهكذا …..

لان كل جيل معالجات ليه سوكت مختلف على سبيل المثال معالجات انتل من الجيل التاسع والتامن تركب على بورده بسوكت LGA 1151، ومعالجات Ryzen من AMD تركب على بورده بسوكت AM4.
ولو عاوز تعرف السوكت الخاص بالمعالج بتاعك ممكن تبحث عنه على موقع الشركة او باستخدام برنامج CPU-Z.

* Chipset & Overclocking

بعد ما اخترنا المعالج والسوكت اللي بيشتغل عليه لازم تختار الChipset المناسب للمعالج.. ومعناها باختصار شديد موديل او اصدار البورده….

بالنسبة لأنتل ال chipset ممكن تكون محيرة شوية لأنه في أربع أنواع مختلفة بشرائح مختلفة:
شريحة الـ Z—- Z370
تاني شريحة الـ H—- H370
تالت شريحة الـ B—- B360
وأخيرا شريحة الـ H—- H310
لاحظ ان في حرفين H هنشرحهم متقلقش.

شريحة الـ Z: هي الشريحة الأعلى وبتدعم أكبر قدر من المميزات والاضافات زي كسر سرعة المعالج والرامات وتركيب كروت شاشة متعددة، منافذ USB اكتر، منافذ M.2 اكتر، ومنافذ PCI-E اكتر … يعني بالمختصر أفضل واقوي المميزات موجودة في فئة الـ Z.

لاحظ ان فئة الـZ هي الفئة الوحيدة الداعمة لكسر السرعة من انتل.

 تنويه بسيط: كسر السرعة ينطبق فقط على معالجات من فئة الـK من انتل زي I9-9900K، أي معالج من انتل بدون الـK لا يدعم كسر السرعة.

هنتكلم عن شرائح الـ H,B,H وليه في حرفين H؟!

كل البوردات دي فيها نفس المواصفات والمزايا مع اختلافات بسيطة زي عدم دعمهم لكسر سرعة المعالج والرامات و كروت الشاشة.

الاختلاف بينهم ان H370 هي اقرب بورده للـZ من ناحية المزايا بس من غير كسر سرعة فقط.
والفرق بين B360 و H310 في أنظمة توصيل الطاقة للمعالج او ما يعرف بـ VRM

بحيث ان بورده H310 الـ VRM الخاص بيها ضعيف وبالتالي هي مناسبة للمعالجات الضعيفة زي I3-9100
وهنا تعالوا نجاوب على سؤال محير ناس كتير هل المازربورد بتأثر على أداء المعالج؟

الجواب بشكل عام لا، لكن ممكن تأثر في بعض الحالات على سبيل المثال معاك معالج i9-9900K وركبته على بورده Z370 من Gigabyte وبورده تانيه Z370 من Asus هنا مش هيحصل مشاكل او مش هتلاقي فرق في الأداء لأنك استخدمت المعالج الصح على البورده الصح.. وزي ما وضحنا فوق ان فئة الـZ هي اعلي فئة من انتل, لكن في حالة معاك معالج بيحتاج باور عالي زي I7-9700K وركبته على بورده H310 هنا ممكن متحصلش الأداء الكامل من المعالج … لأنه أولا مش هتقدر تعمل كسر سرعة للمعالج … وثانيا المعالج مش هيوصل للسرعة القصوى بتاعته (Boost Clock) بسبب ضعف أنظمة توصيل الطاقة اللي اتكلمنا عنها في بوردة H310
بس في كل الأحوال مين هيركب معالج I7-9700K سعره حوالي 400 دولار على بورده بسعر 50 دولار… شيء مش منطقي!!!!

 

خلصنا من انتل تعالوا نروح علي amd

ومع amd الوضع ابسط بكتييير، لان كل معالجات الـRyzen من amd بتشتغل علي بوردات بشريحة AM4 بلا استثناء زي :

-A320 اقل بورده
-B350
-B450
-X470
-X570 اعلي بورده

شركة amd متبعة سياسة سهلت علي المستخدمين كتير جدا لانهم قرروا يستمروا علي سوكت AM4 من وقت اطلاقه وحتي عام 2020 وبالتالي في قابلية كبيرة جدا لتحديث المعالج مع مرور الوقت باستخدام نفس البورده، واهم المزايا كمان ان كل معالجات الرايزن قابلة لكسر السرعة من معالج R3-1200 الي معالج R9-3950X ، والاهم من كده ان كل شرائح او بوردات AMD اللي ذكرناهم فوق داعمين لكسر السرعة ماعدا A320

ببساطة بورده A320 هي Entry Level يعني حاجة كده للمبتدئين فيها الأمور الأساسية فقط .. ولا تدعم مزايا كبيرة زي كسر السرعة او رامات بسرعات كبيرة ونظام توصيل الطاقة بها متواضع.
اما بوردات B450\B350 فيهم مزايا اكتر من كسر سرعة المعالج ودعم رامات بسرعات عالية وطبعا VRM افضل.
ولكن لو عاوز تعمل تجميعة احترافية وتكسر سرعة بشكل كبير وتستخدم رامات بترددات عالية لازم تروح لبوردات X470\X570 لانه فيها أنظمة طاقة قوية جدا … ومنافذ اكتر للهاردات والرامات ودعم تركيب اكتر من كارت شاشة ومزايا كتيره جدا.

 

* Form Factor

والمقصود بيه حجم البورده، وفيه 3 أحجام أساسية للبوردات وهي:
ATX و Mini-ATX و Micro-ATX
وفي حجم رابع كمان وهو E-ATX أي Extended ATX وهو منتشر بشكل كبير وهي الأكبر حجما وغالبا بتكون في البوردات الاحترافية جدا.
تنويه بسيط: حجم البورده ليس له علاقة نهائيا بالاداء.

ومش هنتعمق اوي في نقطة حجم البورده، لان الحجم شيء تفضيلي، في اشخاص مثلا تفضل الأجهزة صغيرة الحجم فالحل الأمثل ليهم هي بوردات ال mini او micro

واكتر الاحجام شهرة وانتشار هو ATX وتقريبا ده الحجم اللي كلنا بنستخدمه.
وللعلم الكيسه الداعمه لتركيب بورده من حجم ATX تدعم تركيب الاحجام الأصغر mini\micro … والكيسه الخاصة بالاحجام mini\micro لا تدعم تركيب الاحجام الأكبر.

* Extra Features

والمقصود بيها المميزات الإضافية اللي بتيجي مع البورده زي الـ RGB.

علي سبيل المثال بورده زي X570 من Aours فيها كل ما يخطر علي بالك من مميزات من تبريد علي البورده نفسها وكمان نظام RGB متطور.

بالإضافة لوجود wifi علي البورده نفسها وشوية منافذ اكتر علي مداخل usb كتييير

لكن السؤال هنا هل انت محتاج كل المميزات ديه؟!!!
لو ميزانيتك محدودة على الاغلب لا … لأنك مثلا لو بتلعب العاب اونلاين يفضل تستخدم الانترنت عن طريق الكابل ولا تستخدم الواي فاي وبالتالي مش هتحتاج ان البورده يكون عليها واي فاي وبكده هتوفر في حدود 20-25 دولار … نفس الكلام برضو بالنسبة للـ RGB وخصوصا انه مش بياثر علي الأداء اطلاقا ملهوش فايدة الا الشكل الجمالي فقط لا غير.

سيبلنا تعليق برأيك ف المقاله ؟ ولو استفدت متكسلش تشيرها.

وشوف باقي السلسلة من هنا

شاهد أيضا:

اترك تعليقاً