تعريف الرامات ووظيفتها ايه؟ (سرعة الرامات ونوعها)

استكمالا لسلسلة اسأل جيكس واللي بدأناها معاكم بالبروسيسور مرورا بكارت الشاشة واللي تقدر تتابعها في المقالات السابقة. 
هنكمل معاكم السلسلة.. وموضوعنا النهارده عن الرامات

طبعا لازم نعرف في الأول هي ايه الرامات اصلا ووظيفتها ايه ؟

البروسيسور بيحتاج ملفات معينه عشان يقدر ينفذ الأوامر اللي انت عاوزها منه .. الملفات دي موجودة على الهارد، والهارد ده مهما كان سريع الا انه يعتبر بطيئ جدا بالنسبة لمعدل الداتا اللي بيطلبها البروسيسور.. ومن هنا بتيجى وظيفة الرام اللي بيكون وسيط ما بين الهارد والبروسيسور.

مثلا لما انت بتشغل الكمبيوتر بتاعك بيقوم الجهاز ناقل البيانات الخاصة بنظام التشغيل “الويندوز” من الهارد على الرامات وبعدها بتلاقي الويندوز فتح.. ومع فتح أي برنامج بتستخدمه الجهاز الأول بيقرا البيانات بتاعته من الهارد ويحطها في الرام في الوقت اللي انت بتستخدمه فيه.. ومجرد ما تقفل البرنامج الجهاز هيمسح الملفات بتاعته من الرام.
مثال تاني برنامج الـ Word لو انت شغال عليه وبتكتب في مقال مثلا الملف بيكون متخزن على الرامات مؤقتا ووقت ما تعمل save للملف … الملف بيتخزن مباشرة على الهارد. ولو قفلت ال word قبل ما تحفظ الملف تلقائيا هيتمسح من الرامات.

محتاج رامات قد ايه في الجهاز؟

في الوقت الحالي لا أنصحك انك تقل عن رامات 8 جيجا … في الغالب هتكون كافية معاك جدا للتصفح والأفلام والالعاب وشغل برامج المونتاج وإيديت علي خفيف.

رامات 16 جيجا بقا في الوقت الحالي ممتازة جدا لمعظم البرامج التقيلة زي adobe و Autodesk وكمان ممتازة لمحبي الألعاب التقيلة زي battlefield وغيرها…

في طبعا رامات أعلي من كده زي 32 جيجا وبتوصل كمان لـ64 جيجا لكن الأحجام ديه بتكون في الغالب للأشخاص المحترفين والاستديوهات الخاصة بصناعة المحتوي او لتعدد المهام مثلا زي تشغيل اكتر من تطبيق في نفس الوقت او عمل ريندر وتصفح في وقت واحد…

بعد ما اتكلمنا عن حجم الرام اللي ممكن يكون مناسب ليك .. لازم تاخد بالك من بعض العوامل اللي هتفرق معاك في اداء الجهاز بغض النظر عن حجم الرام.

في حاجتين مهم جدا انك تعرفهم في اللاب اللي انت هتشتريه .. وهما:

– العامل الأول هو نوع الرمات او الـ interface بتاع الرام:

ودى بتكون DDR2 او DDR3 او DDR4 اللي هو أعلي حاجة حاليا ولكن ايه معنى DDR دي اصلا وايه الرقم اللي بيجى بعدها؟

باختصار شديد جدا دون الدخول في تفاصيل تقنية وفيزيائية كتير ال DDR دي اختصار لـ Double data rate يعني معدل نقل البيانات أما الرقم اللي بيجى بعدها دا بيكون اصدار ال interface نفسها..

ف DDR3 معناها Double data rate type 3اي الإصدار الثالث
و DDR4 معناها Double data rate type 4 أي الإصدار الرابع وهكذا…

وبشكل عام كل ما ال interface بتاعة الرام بتكون أحدث كل ما كان الأداء أفضل وأسرع وتدعم أحجام أكبر وتكون أقل في استهلاك الطاقة وأصلا غالبية الأجهزة الجديدة دلوقتى بتيجى برامات DDR4

• أما العامل التانى وهو ال clock speed بتاع الرام، أو بمعنى اصح سرعتها ..
  ودا هتلاقيه بيتقاس بالميجاهرتز .. وهتلاقيه بالأرقام دي غالبا ..
  2133 – 2400 – 2666 – 3200 – 3400 – 3600
  وفي سرعات اعلي من كده. وسرعة الرامات كمان بتكون متوقفة علي اصدار ال interface بحيث كل ما تكون ال interface اعلي كل ما تدعم سرعات اعلي.

خلي بالك…!

فيه كام ملحوظه مهمه بخصوص الحاجتين اللي فوق دول مهمين جدا .. وخصوصا لو هتزود رام اللاب توب بتاعتك في المستقبل

1- مفيش لاب ممكن يركب فيه رامات من اكتر من Interface مختلف في نفس الوقت .. يعنى اللاب لو جاي بيقبل رامات DDR4.. مينفعش تركب فيه رامه DDR3..
الرامه نفسها معموله بطريقه متخليهاش تركب في المكان نفسه حماية لجهازك من أي مشاكل ممكن تحصل

2- لو اللاب توب بتاعك فيه اكتر من مكان للرامات .. والرامتين اللى راكبين فيه نفس السرعة.. ف الجهاز هيشتغلهم عادى جدا بالسرعة الطبيعية بتاعتهم ..
انما لو انت مركب رامتين وكل واحده منهم سرعتها مختلفة عن التانيه .. فالجهاز هيشغل الرامتين على سرعة الرامه الأقل، خد المثال دا :

لو اللاب بتاعك فيه رامه 8 جيجا بتردد 2133 .. وجيت زود رامه تانى 8 جيجا بردو ولكن بتردد 2400 ..
اللاب هيبقى فاهم ان سرعة كل رام فيهم مختلفة عن التانيه ولكنه محتاج انهم يكونوا زي بعض عشان يشتغل صح .. وبما انه مش هيقدر يزود سرعه الرام ال 2133 اللي عنده.. ف بيضطر وقتها انه يقلل من سرعة الرامه الأعلى اللي هي في حالتنا دي سرعتها 2400.. ويشغلها بسرعة الرامه الأقل اللي هي سرعتها 2133 ..

3- ملحوظة اخيره كمان .. حجم الرام كعامل في اختيار اللاب توب مهم ولكن مش بقدر اهمية البروسيسور وكارت الشاشة لان دول مش هتقدر تغيرهم مستقبلا. لكن الرامات ممكن تزودها عادى وممكن تغيرها بدون أي مشاكل.. يعني مثلا لو البروسيسور عندك قديم وضعيف… زيادة الرامات مش هيكون ليها أي لزمة… هتكون بترمي فلوس في الأرض وخلاص.
إضافة: لو حابب تعرف معلومات عن الرمات الموجودة على الجهاز بتاعك ممكن تستخدم برنامج CPU-Z.