لو أنت مش عارف ازاي تختار مواصفات اللابتوب أو ال PC المناسب ليك فأنت بترمي فلوسك في الأرض!!

لأنك بإختصار يا بتشتري إمكانيات أقل من اللي أنت محتاجها ومش هتلبي احتياجاتك أو بتدفع فلوس ف حاجه أعلي مش هتستخدمها أصلاً.

عشان كدا لخصنالك ببساطه ازاي تختار جهازك سواء كنت (مبرمج, صانع محتوي, جيمر).

تعالو نبدأ بالمبرمجين (فئه الهاكرز)

لو أنت مبرمج، في شويه مواصفات لازم تركز عليهم في الابتوب بتاعك.

مهم جدًا يكون فيه معالج قوي، يعني متختارتش اقل من Intel Core i7 أو AMD Ryzen 7 ويفضل جيل حديث كمان، عشان تشتغل على بيئات التطوير براحتك وبسرعة.

الذاكرة مهم جداً تكون على الأقل 16 جيجابايت أو اكتر بالذات لو انت بتعمل VMs كتير او شغال containers, أما لو شغلك في مجال الAI فأنت اكيد هتحتاج كارت شاشه بحجم ذاكره كبير و يكون من NVIDIA عشان الcuda.

مش بس كده، لازم اللابتوب يكون فيه وحدة تخزين SSD، لأن دي بتكون سريعة في نقل البيانات وفتح التطبيقات بسرعة ومتنساش ابدأ ان وقتك بفلوس فأستثمر في جهازك كويس.

موضوع الشاشة مهم جدًا و لكن معظم الشاشات دلوقتي هتلبي الغرض. المهم تكون مقاس مناسب ودقة عالية، عشان تقدر تشوف الكود كويس وبوضوح. يعني نقدر نقول بدايتك من Full HD (1080p) أو لو بتفكر في دقة أعلى حسب احتياجاتك أكيد و يفضل انها تكون جايه بشهاده الTUV عشان تحمي عينك من الاشعه الضاره.

ونصيحه بسيطه هات لابتوب خفيف لو تقدر وهتشكرني بعدين صدقني.

نروح للفئه التانيه ألا وهم صناع المحتوى (حبايبنا)

اللي بيصنعوا محتوى زي صور وفيديوهات، بيحتاجوا لأجهزة خاصه ده لأنه بيكون ليه متطلبات معينه.

المعالج والذاكرة مهمين جدا زي المبرمجين، ولكن ممكن تحتاج ذاكرة أكبر زي 32 جيجابايت عشان تشتغل على تعديل الفيديوهات والجرافيك و ميجيبلكش out of memory ها.

كارت الشاشة لازم يكون قوي عشان تقدر تشتغل على الجرافيك وتعديل الفيديو بجودة عالية والتايم لاين ميقطعش منك وبرضو هنروح لـ NVIDIA عشان الoptmization بتاعها عالي مع برامج الريندر.

أما الشاشه فأنت هتحتاج شاشة كبيرة على قد ما تقدر ودقة عالية هتفيدك جدًا ومتهتمش خالص بمعدل التحديث ولكن اهتم بدقه الألوان جدا جدا جدا ويفضل لو الشاشة OLED لأنها هتديك تشبع الألوان اللي انت محتاجه، وبالنسبة للتخزين ممكن SSD بسرعة عالية وسعة كبيرة عشان تخزن الملفات الكبيرة وتسرعلك وقتك في نقل البروجيكتات الكبيره.

نيجي بقا لوحوش الجيمز

اللي بيحبوا الألعاب سواء AAA او competitive

الابتوب لازم يكون قوي عشان يقدر يديك معدل فريمات عالي لو انت بتلعب competitive او دقه و جوده عاليه لو انت بتلعب AAA.

المعالج وبطاقة الرسومات لازم يكونوا قويين بجد المره دي. ممكن تروح ناحيه NVIDIA GeForce أو AMD Radeon، هيكونوا مناسبين جدا للألعاب الحديثة و لو مهتم بألعاب بتدعم تقنيات زي الRay tracing او الDLSS فروح لنفيديا غير كده AMD اكيد.

أهم حاجه بالنسبالك في الشاشه هي معدل التحديث انه يكون عالي فعندك من اول ١٤٤ هتكون مناسبه و يكون معدل الاستجابة عالي 5ms او اقل و يفضل ان الشاشه تكون بتدعم الG-sync عشان تاخد اكبر سلاسة ممكنه.

التبريد، اهتم بالتبريد يا حسن.

لأن الألعاب بتضغط جامد على المعالج وكارت الشاشه وده هيولد حراره عاليه فلو التبريد مش اد كده مش هتقدر تستفيد بجهازك حتى لو إمكانياته ايه وافتكر دايما إن لابتوب مع نظام تبريد قوي هيبقى احسن.

بس كده حاولنا نبسطلكم الاختيارات على قد ما نقدر ولو عندك أي استفسار تقدر تسألنا في الكومنتات أو تبعتلنا علي رسائل الصفحة هنرد عليك اسرع ونساعدك