افضل انواع المعجون الحراري

اللاب بتاعك بيسخن بسرعه و بيفصل منك كل شويه بسبب الحرارة؟
جربت طبق البيض و جبتله كولر و برضو مش نافع؟

اعتقد جه الوقت انك تغيرله المعجون بس يا ترى هتجيب انهي نوع؟
تعالى اقولك تجيب انهي و بناءاً على ايه!

أولاً أهم ٣ حاجات بيحددوا أداء المعجون هما
(التوصيلية الحراريه – معامل اللزوجه – التوصيلية الكهربية)

✅ التوصيلية الحراريه هي قدره المعجون على نقل الحرارة وبتتقاس بالوات لكل متر كيلفن و الرقم ده كل ما بيزيد كل ما بيدل على جوده المعجون وبتكون أعلى قيمه ليه في الLiquid metal واللي بتوصل ل٧٣ وات لكل متر كيلفن وده رقم كبير جدا
✅ تاني حاجة هو معامل اللزوجه هي قدره المعجون على الإنتشار لما يكون مضغوط عليه و بتتقاس بالباسكال ودي مفيده عشان لما تيجي تربط مسامير الكولر المعجون ينتشر كويس ويغطي سطح المعالج كله
✅ تالت حاجه وهي التوصيليه الكهربيه و دي يا إما موصل أو عازل و يفضل طبعا تجيبه عازل عشان ميعملش short circuit ويحرق حاجه في الجهاز لا قدر الله

بناءً على ال٣ حاجات دول، دي أفضل ٣ انواع ممكن تشتريها حالياً في السوق:
١- Arctic MX-5
2- Nuctua NT-H1
3- Cooler master gel pro
دول من رأينا أفضل ٣ انواع بالترتيب موجودين حالياً في السوق المصري طبعاً لو لقيت الMX-4 فهو كويس جدا مكان ال MX-5 لأن الفرق بينهم بسيط جداً في معامل اللزوجه والباقي نفس بعض بالظبط

و يفضل إنك تغير المعجون بتاعك كل ٦ شهور على الاقل عشان تحافظ على أداء جهازك و عمره الافتراضي.

قولنا بقا ايه المعجون اللي بتستخدمه وفرق معاك ولا لا؟