لشراء أجهزة اللابتوب تواصل معنا أولا من خلال الشات

البروسيسور مخ الجهاز (الجزء التاني)

البروسيسور مخ الجهاز

اتكلمنا في البوست اللي فات عن البروسيسور وبعض مفاهيمه والنهارده هنوضح جيل وفئة كل بروسيسور عشان تبقى فاهم.

انت بتختار بروسيسور اللابتوب أزاي؟

أكيد سمعت قبل كدا حد بيقولك دا بروسيسور i5 الجيل السادس أو السابع أو الثامن وفي الجيل التاسع دلوقتي.

وأكيد كل ما الجيل كان أحدث “رقم اكبر” كل ما كان أفضل.. لكن ايه اللي بيفرق فعلا من جيل للتاني؟

شركة Intel كل سنة تقريبا بتعلن عن الجيل الجديد من المعالجات بتاعتها.

ولازم تعرف ان انتل بداية من الجيل الثالث وأنت طالع ليها استراتيجية كدا في الأجيال اللي بتصدرها من المعالجات بتاعتها، جيل مثلا بتحدث فيه المعمارية بتاعته, والجيل اللي بعده التحديث بيكون بسيط جدا في الأداء الخاص بالبروسيسور من خلال زيادة التردد اللي المعالج يقدر يوصله من خلال خاصيه زي التربو بوست اللي اتكلمنا عنها قبل كدا.

يعني مثلا..

البروسيسور i7 6700HQ دا جيل سادس و i7 7700HQ جيل سابع, المفروض إن يكون فيه فرق كبير ما بينهم, لكن فعليا الفرق ما بينهم مش ملحوظ أصلا لأن معمارية البروسيسور وكل حاجه في تصميمه متطابقة في الاثنين, كل الفرق إن الجيل السابع أعلى في التردد ب 0.2 جيجا هيرتز ليس إلا!
وتقدر تتأكد من دا ف مواقع البينش مارك.

طبعا اللابتوب اللي ببروسيسور جيل سادس هيكون أرخص شويه من السابع لأن السابع الأحدث وبالتالي سعر الجيل السادس هيقل ومش هتلاحظ فرق في الأداء تقريبا.

طيب أعرف ازاي الجيل والفئه بتوع البروسيسور؟

الموضوع بسيط.. الرقم اللي بعد i7 او i5 او i3 هو الجيل.

مثلا i5-2520M دا جيل تاني.
و i7-3620QM دا جيل تالت.
و i7 6700HQ دا جيل سادس وهكذا.

والأرقام اللي بعد الرقم الأول الخاص بالجيل، ده الموديل بتاع البروسيسور, والحروف اللي ف الاخر زي U , H , HQ , HK , M ديه الفئة الخاصة بالبروسيسور.

خلي بالك..

أي بروسيسور يتكون من ثلاثة أرقام فهو جيل أول زي i7-940 ده بروسيسور جيل أول.

مثال للتوضيح أكثر أول ما تشوف البروسيسور ده i7 6700HQ بتستنتج منه أربع حاجات:

– المعالج بينتمى لأنهى سلسلة من معالجات انتل i7
– الموديل بتاعه 700
– المعالج من الجيل الكام 6
– الفئة بتاعته HQ

وعشان تعرف معلومات وتفاصيل أكتر عن أي بروسيسور انت عاوزه هتاخد اسم البروسيسور وموديله وفئته اللي هما i7 – 6700HQ وتسيرش عليه على جوجل.

من ضمن نتائج البحث اللي هتظهرلك هي صفحة مواصفات المعالج على موقع انتل.

الصفحة دي مفيدة جدا لأنك بتلاقي فيها تردد البروسيسور وعدد الانويه وخطوط المعالجة Threads، وكمان الكاش ميموري… وتم شرح الكلام ده بالتفصيل.

دا كان مجرد شرح بسيط للجيل والفئة وتوضيح لبعض المفاهيم الرئيسية اللي المفروض تكون عارفها قبل ما تشتري جهازك.

لو استفدت من البوست دا اعمل شير وادعمنا ولو عندك أي استفسار سيبه ف كومنت وهنرد عليك.

شاهد أيضا:

اترك تعليقاً