شحن مجاني لأي اوردر فوق 999 جنية !

الفرق بين الهاردات SSD vs SSHD vs HDD

الهاردات

النهارده معادنا مع مقال جديد من سلسلة شروحات اسأل جيكس, وهنتكلم عن “الهاردات”.

الهاردات عموما بتكون نوع من ثلاثة:

1- النوع الأول هارد HDD أو Hard Disk Drive وده بيتكون داخلياً من مجموعة من الاسطوانات وفيه إبره بتكتب وتقرأ الداتا من عليهم.
والهارد ده هتلاقى منه سرعتين.. الأولى 5400 والتانيه 7200 والرقم ده بيعبر عن عدد لفات الأسطوانات اللي جوا الهارد في الدقيقة الواحدة وبيعبر عنه بال RPM

وكل ما الرقم بقي اكتر كل ما كان الهارد أسرع.. ولكن بيستهلك كهرباء اكتر وكمان يطلع سخونة اكتر … عموما غالبية أجهزة اللابتوب هتلاقيها بهاردات 5400.

واكتر حاجة تميز النوع ده من الهاردات انه بيقدم مساحات تخزينية كبيرة جدا بسعر مناسب جدا. يعني هتلاقي مساحات زي 1 تيرا او 2 تيرا وحتى 4 تيرا كمان.
وأكبر عيب للهارد ده هو قابليته الكبيرة للتلف وفقدان الملفات بسبب الأجزاء المتحركة الموجودة فيه. فلازم تكون حريص جدا عليه من الصدمات والوقعات.

2- اما النوع التانى هارد SSD او Solid State Drive والهارد ده بيتكون من الداخل من شرائح الكترونية يعني مفيهوش أي أجزاء متحركة او باختصار شديد هو فلاش ميموري كبيرة. وللعلم الـ SSD لا يعتبر هارد لكن بنقول عليه هارد مجازاً فقط.
بس للأسف الـ ssd بيكون غالى شوية وسرعته أكبر بـ 5 مرات على الأقل من الـ HDD

3- اما النوع التالت وده اقلهم شهرة وانتشار. هارد SSHD أو solid-state hybrid drive
و ده مجرد هارد HDD لكن بيكون جواه هارد SSD صغير جدا حجمه بيكون غالبا 8 جيجا. فكرته ان الملفات اللي بيحتاجها الويندوز او البرامج المستخدمة بشكل مستمر بتكون موجودة في المساحة الصغيرة. عشان الويندوز او الرامج تشتغل بشكل أسرع. ولكن عيبه ان مساحة الـ ssd صغيرة جدا. ده غير انه مش ممكن تتحكم في الملفات المخزنة على الـ ssd لان العملية دية بتم بشكل تلقائي من الهارد نفسه.

معلومات سريعة:-

– هاردات الـ HDD او الـ SSHD بيكون ليها حجمين او مقاسين وهما 2.5 بوصة أو 3.5 بوصة. حجم 2.5 بوصة ده بيكون موجه لأجهزة اللابتوب. اما حجم 3.5 بوصة موجه لأجهزة الـ PC
– اما الـ SSD فهو عبارة عن مقاس واحد 2.5 بوصة لأجهزة اللابتوب والـPC مع بعض.

– مقارنة “تخيلية” بالأرقام عشان نعرف الفرق بين التلات أنواع لما نجي نشغل اللابتوب ويفتح الويندوز
– الـHDD محتاج 30 ثانية عشان يفتح الويندوز.
– الـSSHD محتاج 22 ثانية عشان يفتح الويندوز.
– الـSSD محتاج 20 ثانية عشان يفتح الويندوز.

كده احنا خلصنا أنواع الهاردات. تعالوا نتكلم عن شوية تفاصيل ومعلومات إضافية مهمة جدا.

وانت بتدور على جهاز لاب توب جديد اتفاجأت ان فيه وحدة تخزين من نوع M.2 غير اللي اتكلمنا عنهم فوق.

ايه بقى ال M.2؟

الـ M.2 لا يعتبر نوع مستقل من أنواع الهاردات. لأنه ببساطه هو شكل من هاردات الـ SSD ولكن حجمه صغير. شبيه جدا بالرامة وبيتركب على المازربورد مباشرة في مكان خاص بيه زي بتاع الرامة كدا بس على أصغر شويه.. المكان ده اسمه M.2 slotاو منفذ الـM.2
والـM.2 مش هتقدر تركبه غير مع بروسيسور او مازربورد من الجيل السابع او اعلي. يعني لو عندك بروسيسور اقل من الجيل السابع مش هتقدر تركب او تستخدم M.2

والنوع ده من الهاردات ليه اتنين بروتوكول لنقل البيانات بينها وبين المازبورد. والبروتوكول ده تقدر تقول انه الطريقة اللي بيتواصل بيها الهارد مع المازربورد .. ودي تنقسم لطريقتين او بروتوكولين.. الاول بنسميه SATA 3 والتاني بنسميه . NVMeوالبروتوكول ده باختصار شديد نقدر نحدد او نعرف منه سرعة M.2

كل الفكرة ان SATA 3 بيكون ليه سرعة قصوى في نقل البيانات وبتكون أقصاها 600 ميجا بايت في الثانية الواحدة.
اما الـ NVMe بيدعم سرعات نقل أكبر بكتير. السرعات دية ممكن توصل لـ 3000 ميجا بايت في الثانية الواحدة! ايوه انت قرأت الرقم صح…وممكن السرعة تكون أكبر من كده كمان في الإصدارات الجديدة. ولكن في الغالب مفيش حد هيستفاد من السرعات دية الا منشئ المحتوي او محبي الألعاب.

ملحوظة مهمة:

لو استخدمت M.2 NVMe على منفذ لا يدعم الا M.2 SATA 3 يبقا انت كده ضيعت سرعة الـNVMe الكبيرة لأنه في النهاية مش هيقرأ ويكتب الا بسرعة SATA 3 اللي هيا 600 ميجا بايت فقط.

لو اللابتوب بتاعك قديم ومفيهوش منفذ M.2 او مش موجود مكان تاني لتركيب SSD مثلاً هتعمل ايه؟!
وقتها هتركب الهارد الـHDD مكان ال CD-ROM من خلال حاجه كدا اسمها “راكه” او بالإنجليزي اسمها hdd caddy ودى بتركب فيها الهارد وبتركبها في اللابتوب مره تانى مكان ال CD-ROMوالـSSD هنركبه بقا مكان الهارد الأساسي عشان نستفاد بكامل سرعته.

واخر نصيحة متخليش موضوع الهاردات ده عامل مهم في اختيار اللابتوب. الأولوية دائما تكون للبروسيسور وكارت الشاشة. اما الهارد تقدر في اى وقت أنك تغيره بواحد أكبر او أسرع عادى جدا بكل بساطة وسهولة.

لو فيه حاجه مش واضحة اسأل في التعليقات واحنا هنجاوبك على طول ان شاء الله.

شاهد أيضا:

اترك تعليقاً